Rom 13 | BEF | STEP | Lenali asaga gamani bona'magihi kaga kehelite mege'i malalo. Hu'mau enali enele'mo ho ti'ehigo enali kaba huse lili'na lilata nehana'mu ai enele'mo molo'ehibe. Gamani bona'i mone kegi'amagi fa'mene hite memine'ahanaya, Hu'mau ai enele'mo ho ti'ehina yabe.

Romans 13

Lali gamani bona'i kaga mege'i malalune

1 Lenali asaga gamani bona'magihi kaga kehelite mege'i malalo. Hu'mau enali enele'mo ho ti'ehigo enali kaba huse lili'na lilata nehana'mu ai enele'mo molo'ehibe. Gamani bona'i mone kegi'amagi fa'mene hite memine'ahanaya, Hu'mau ai enele'mo ho ti'ehina yabe. 2 Ya hu'ehina'mu bona'magi gamani bomofihi kagalo keheli he'mite enemegesa hu emilenogo enali Hu'mamofihi kaga'alo he'milata suhi lite nehabe. Ya nehinogomo Hu'mau ana pelesa ilata nehanamofihi osahi epilina'mu yabe. 3 To bebe sete nehana bona'magi ana gamani bona'i kaba huse'na'amofihi koli mehilata nehabe. Kegeiyo huse bona'magi ana gamani kumu koli hilata nehabe. To lenali eto eto hite lamana hiti ana kaba bona kumu koli mehilabe. Ya bati hite minelenogo ana kaba bouba lenali kumu fokehi lilibe. 4 Ya'ma gamani bo Hu'mamofihi lili'na lilata bo ai lenehe'malina bo nohina yabe. Lenali li sibina hilenogomo ana kaba bomu'i koli hilo. Ai amuya bo nohuto li sibina hilanamofihi nona'a lepilibe. Ai kegeiyo nehana bona'i Hu'mau ita binogo ka epekilina bo'a suhi huto ai osahi epilina'mu yabe. 5 Yana'mu lenali gamani bona'magihi kaga kehelite mege'i malalanamoya hena'mube? Hu'mamofihi ita bise'na lenalitoga huto hu laligi gamanimofihi kaga'a mege'i melenogomo komopatinigu fulu huto bati hilibe.

6 To gamanimagi Hu'mamofihi kele kele hi etalabe lite kaba huse foya nelibe. Ya'mu lenali gamanimagi lilanaga lilanaga hite takisi kefahi epilo. 7 To ya hite gamani bona'magihi mina'a efahi asaga'i epilo. Ya'ma takisi efahatini fato fato'i epilo. Ya hite takisi bona'i kaga'ani kehelite to enalitoga agoya hu epite limi lalabe lite mele'isi ana'ina ya'ma bona'i asaga'i epilo.

Koguna ite minalana hapa'a

8 Bona'i moneuba lepi'ehinamofihi nona'a pa sete mele'isi li emilo. To mone hiti ni'igo lenali boana'i ginaga fi emise'namu ya'ma minoba minoba hite nehanaya su mehalina'mu yabe. Lenali ya ginaga fi emilatanamofihi ya'ma Hu'mamofihi keya ka mege'i melelata nehana'mu yabe. 9 To keya kaluguti ma luto lu'ehina:A'i gumina mefolobo. Bona'i ho mefilibo. Gumina melibo. Bona'mofihi fe'noha'a lilube luto kubu naga'i mehobo.Ya'ma keya ka asaga'i li nupa hu'ehina'amofihi hapa'a ma ni'ibe:Kai kugufaka kaba hulata nohata supo huto asaga bona'magihi kaba hu epoloto kiginaga fi epibo. 10 Lenali bonatinimu ginaga fi epilete mone li sibina mehi epalalana'mu yabe. Ya hilata nehanaya asaga keya ka mege'i mele su he'ahana suhi lite neminabe.

11 Ya'ma ginaga fi epilata nehabe luto nolunaya henabe luto nolube? Hu'mau Sipi Botiuba lele'malina kana'a lebato'isi ni'inagihe. Koyapa lali yata'a Kilisitohi keheli ule'ale huto komopati emi'ohuta lele'malina kana'a foto'i mino'ehina, to lubuto bilina kana lebato nehetilibe. Yana'mu lenali lenubu kolo kolo hite neminabe. Yatai topa hete ho tilo. 12 Yatai kana'a sinihi gise suhi huto ni'ina ma'asi su halibe. Kokulumalugu go'i lilina'mu yabe. Lali foipana nohutana metepuhi nasana li he'mi su halune. To go'i lulenogomo lali gimi gito Sataha naga'i hiti lugufati foipana nohinana'a hiti luba hilune. 13 Lali yegemofihi besa besa'alo minototi agoya huse bona'magita minaluta nohune. Lali kegeiyo huse'na melilune. To bia nagami'i negi noto huse'nafi to moko lise'nafi to a'i gumina folose'nafi to luba huse'nafi to kenasabo bise'nafi asaga'i mehiluta'mu analo lemegesa hu emilune. 14 Lenali lenugufaluga laga besise'namofihi foipa nasanamu'i lenegekesa yigi yigi mehite ananamofihi le'mo laba hilo. Sipi Boti, Yesu Kilisitohi helegu'i lite ya suhi hite neminana bona'i lenali li so kite aitoga minete ule'ale hite minalo.